Кумановскиот прволигаш уште еднаш покажа дека иднината на клубот ја гледа во сопствената школа, откако го потпиша првиот професионален договор со 17-годишниот Бејзад Лимани.
Лимани, кој настапува во средниот ред, доаѓа од младинските категории на Башкими и веќе подолго време е дел од системот на клубот. Со своите настапи и посветеност на тренинзите успеа да го привлече вниманието на стручниот штаб, кој одлучи да му даде шанса и во сениорската конкуренција.
Младиот фудбалер веќе го почувствува ритамот на Првата македонска фудбалска лига. Тој го запиша своето деби во последното коло од есенскиот дел од сезоната, кога настапи како резерва на дуелот против шампионот Шкендија, а во уште два наврати беше дел од натпреварувачкиот состав.
Со овој потег, раководството на Башкими испраќа јасна порака дека континуитетот и развојот на младите играчи се приоритет, а од Лимани се очекува во наредниот период да продолжи со напредокот и постепено да се наметне како сериозна опција во тимот.
