Хрватскиот репрезентативен пивот Џанфранко Прибетиќ ја сподели својата прва порака по потпишувањето за ГРК Охрид, истакнувајќи дека во новата средина доаѓа со голема мотивација и позитивни очекувања за продолжението од сезоната.
25-годишниот кружен напаѓач, висок 196 сантиметри, кој во Охрид пристигна од најсилната ракометна лига во светот, нагласи дека уште пред доаѓањето слушнал само убави зборови за клубот и градот, што дополнително ја зголемило неговата желба да го облече дресот на „гладијаторите“.
„Многу сум среќен и горд што потпишав за Охрид. Имам слушнато само убави зборови за клубот и за градот и ми претставува особена чест што сум тука. Се радувам на работата со нова екипа и нови предизвици кои не очекуваат во оваа полусезона и верувам дека ќе ги оствариме заедно со навивачите. Едвај чекам да започнат натпреварите и да се борам за целите на клубот“ – изјави Прибетиќ.
Прибетиќ зад себе има богато меѓународно искуство стекнато во Нексе и ТВБ Штутгарт, како и настапи за сениорската репрезентација на Хрватска, а во Охрид пристигнува со јасна желба својот квалитет да го стави во функција на тимските амбиции на домашната и европската сцена.
Изјавата на новиот пивот јасно покажува дека во охридскиот табор се добива играч кој е целосно подготвен да се вклучи во борбата и да ја оправда довербата со силни и посветени настапи во продолжението од сезоната.
