Прволигашот Шкупи и официјално му ја довери тренерската функција на Еркан Мурсели, кој ја презема екипата во еден од најтешките периоди во клупската историја. Чаирчани се наоѓаат на последната позиција на табелата по есенскиот дел од сезоната, со само еден освоен бод, а пред новиот стратег е исклучително тешка задача – враќање на тимот на вистинскиот пат.
Новото поглавје за Шкупи започна веднаш, откако Мурсели денеска го одржа и првиот тренинг со екипата.
Првата прозивка и стартот на подготовките беа симболични, но со силна порака за максимална посветеност, дисциплина и чесна работа во продолжението од сезоната.
Од клубот истакнуваат дека во период кога резултатите недостигаат, а зборовите имаат сè помала тежина, токму присуството и активната улога на новиот тренер треба да бидат сигнал дека Шкупи сериозно тргнува во обидот за резултатски пресврт.
Фокусот ќе биде ставен на целосна мобилизација на ростерот и создавање стабилност во играта, со надеж дека екипата ќе успее да се извлече од незавидната позиција.
Еркан Мурсели во Чаир доаѓа со искуство од домашниот фудбал, а до минатата сезона беше дел од Шкендија Арачиново. Сега го очекува, можеби, најголемиот предизвик во неговата тренерска кариера.
Во Шкупи веруваат дека со новата енергија и јасен фокус, клубот може да започне нов циклус и да се обиде да ја направи мисијата за опстанок барем возможна, иако предизвикот останува огромен.
