Ракометниот клуб ГРК Охрид и официјално го промовираше своето ново засилување за продолжението од сезоната, хрватскиот репрезентативен пивот Џанфранко Прибетиќ, кој потпиша договор со „гладијаторите“ до 2028 година.
Станува збор за 25-годишен кружен напаѓач, висок 196 сантиметри, кој во Охрид пристигнува од најсилната ракометна лига во светот. Прибетиќ во досегашната кариера настапуваше за реномирани клубови како Нексе и ТВБ Штутгарт, а зад себе има и настапи за сениорската репрезентација на Хрватска, што дополнително говори за неговиот квалитет и искуство.
Со својата цврстина, борбеност и чувство за игра на линијата од шест метри, Прибетиќ треба да претставува значајно засилување за охридскиот состав во борбата за висок пласман на домашната сцена и успешен настап во Европа.
Новото засилување не го криеше задоволството од трансферот во македонскиот клуб и испрати порака до навивачите на Охрид.
“Многу сум среќен и горд што потпишав за Охрид. Имам слушнато само убави зборови за клубот и за градот и ми претставува особена чест што сум тука. Се радувам на работата со нова екипа и нови предизвици кои не очекуваат во оваа полусезона и верувам дека ќе ги оствариме заедно со навивачите. Едвај чекам да започнат натпреварите и да се борам за целите на клубот” – изјави Прибетиќ.
Од таборот на ГРК Охрид истакнуваат дека ангажманот на хрватскиот пивот е дел од долгорочната стратегија на клубот, со јасна цел тимот да биде конкурентен на сите фронтови – во домашното првенство, Купот, како и во европските натпреварувања.
Со официјалната промоција на Џанфранко Прибетиќ, охриѓани уште еднаш ја потврдија својата амбиција и сериозните намери за продолжението од сезоната.
