Прволигашот Башкими 1947 го официјализираше првото засилување за пролетниот дел од сезоната, ангажирајќи го офанзивецот Фодеј Травали. Гамбискиот фудбалер во редовите на кумановскиот клуб доаѓа од Брера Струмица и ќе биде дел од офанзивната реконструкција што ја спроведува клубот оваа зима.
Во дресот на Брера забележа четири настапи, а низ својата кариера Гамбиецот настапуваше и за Четинкаја од Кипар, турскиот Тузласпор, за естонските екипи Паиде и Калев, имаше настапи за младинскиот тим на Вејле од Данска и за Фортуне од Гамбија.
Во тековната сезона во Првата лига одигра три меча со една асистенција, а запиша и еден настап во Купот на Македонија. Претходната сезона, Гамбиецот во дресот на Брера одигра 11 меча во Првата лига со еден гол и една асистенција, а имаше и три натпревари во Купот на Македонија.
Од клубот истакнуваат дека новото засилување пристигнува високо мотивирано и подготвено да донесе свежина, креативност и поголема опасност во нападот, сегмент во кој екипата имаше најмногу потреба од подобрување. Со своето европско искуство и офанзивни квалитети, Травали треба да биде важен адут во борбата за подобри резултати во пролетниот дел од сезоната.
Тимот денес ги започна и зимските подготовките, а главната фаза ќе биде реализирана на хрватско тло, каде ќе се одиграат и неколку натпревари преку кои ќе се проверува подигањето на формата за пролетните предизвици во ПМФЛ.
