Есенскиот првак во Првата македонска фудбалска лига, Вардар, официјално соопшти дека Управата на клубот донела одлука да утврди откупна клаузула во износ од 1.500.000 евра за фудбалерот Роџерс Касим Мато, поради зголемениот интерес од повеќе странски клубови.
„ФК Вардар АД ја информира јавноста дека, поради зголемениот интерес од повеќе странски клубови за нашиот фудбалер Рогерс Кассим Мато, Управата на клубот донесе одлука да утврди откупна клаузула во износ од 1.500.000 евра“, се вели во соопштението на клубот.
Интересот за Мато е евидентен по неговите одлични настапи во дресот на „црвено-црните“. Во изминатиот период, како што е познато, Вардар добил и конкретна понуда од шкотскиот Хартс во износ од 350.000 евра, која била експресно одбиена од страна на клубот.
Со поставувањето на оваа откупна клаузула, Вардар јасно испраќа порака дека нема намера лесно да се откаже од еден од своите највредни фудбалери, освен доколку не бидат исполнети условите што клубот ги смета за соодветни.
