Вечерва беше отворено 4. коло од Втората футсал лига во тетовска Голема Речица, каде екипата на СЕЕ Университи со 11:0 ја декласираше Победа која доживеа вистински дебакл, иако можеби до некаде истиот и беше очекуван бидејќи Победа допатува со осум играчи, па „тенката“ клупа и малата ротација го направи своето.
Хисен Мемеди со шест постигнати погодоци буквално ја „искина“ мрежата на прилепчани, двоен стрелец беше Гезим Азизи, а по еден гол постигнаа Енсар Синани, Адис Фетаи и Ермал Љиворека.
Победата беше најавена уште на полувреме кога резултатот беше 5:0, а во вториот дел домаќинот како на тренинг само го потврди големиот триумф.
Тетовскиот тим стигна до својата втора сезонска победа и на своето конто има шест бодови и се наоѓа на 4. место. Победа со три бодови е на 5. место, но барем до недела кога ќе биде комплетирано 4. коло.
