Охрид по тренерската промена влезе во страшна серија и нанижа шест од шест, од дното на табелата дојде до петтото место, но сериозно притиска и е во ситуација и за местата кои водат кон Прва лига.
Атмосферата во Охрид е фантастична, клубот игра допадлив фудбал иако официјално нема назначено нов тренер. Како што веќе анализиравме во „Спортска Мрежа Анализа“, младиот Ромео Кочоски кој беше помошник сега го води тимот помогнат и од Гоце Толески, па оваа привремена опција може да премине и во трајно решение и секако дека заслужува.
Тоа што го работи 33-годишниот Кочоски е потврда дека младите тренери треба да добиваат повеќе шанса, тренери кои се посветени на максимално на својата едукација носат големи резултати со себе.
Охрид згази се пред себе и има шест од шест, денес на „Билјанини Извори“ ќе се случи вистинска инвазија на стадионот. Верните „Рибари“ најавуваат масовна поддршка за Охрид, воедно тие го прославуваат својот 35-ти роденден. Двојна радост за верните навивачи.
Охрид во секој сегмент ќе биде голем фаворит на денешниот меч против „пиратите“ од Автокоманда. Одличен и квалитетен тим, кој има одлична кохезија, млад тим со просечна старосна граница од 22,8 години, за формата нема и што да се зборува – шест од шест е потврда за страшната форма на Охрид, домашниот терен, домашната публика и верните „Рибари“ кои ќе приреда одлична атмосфера на трибините.
Охрид е на петтото место со 19 бодови, а со нов триумф може да има 22 бодови и да се надева на „киксови“ на водечките екипи, па во таков случај Охрид ќе се втурне во првите места кои водат кон Прва лига.
Скопје во Охрид го очекува тешко гостување, колку ќе може да го „преплива“ Охридското Езеро и дома да се врати со бодови ќе видиме веќе во 13 часот. Тимот не е во посакуваната форма има само една сезонска победа, само осум постигнати погодоци, со 11 примени.
Охрид и „Рибари“ сакаат седум од седум, Скопје доаѓа по изненадување на „Билјанини Извори“.
