Штипската фудбалска сцена доби нов и амбициозен проект, откако официјално беше најавено отворањето на фудбалската школа ФК Марадона Штип. Станува збор за школа која се темели на сериозна работа, континуитет и јасна визија за развој на младите фудбалери.
Тренерскиот тим и децата успешно соработуваат уште од 2019 година, во рамки на ФК Брегалница Штип, а од оваа година, водени од стремежот кон подобра организација, поголема функционалност и уште поквалитетен пристап во работата, се одлучија за нов чекор.
„Тимот на тренери и децата успешно функционираат заедно уште од 2019 година, под капата на Брегалница Штип. Оваа година, водени од желбата за подобра организација, поголема функционалност и уште посериозен пристап кон развојот на младите фудбалери, се одлучија за нов предизвик – приватизација, ребрендирање и отворање на сопствена фудбалска школа со свое име и терен“, велат од ФК Марадона Штип.
Важно е да се нагласи дека тренерскиот кадар останува непроменет, што гарантира континуитет и стабилност во работата со младите категории. Основач и координатор на ФК Марадона Штип е Дарко Митев, лиценциран фудбалски тренер, магистер по спорт и долгогодишен наставник во ООУ „Димитар Влахов“ – Штип, кој годинава беше прогласен и за Наставник на годината.
Тренерскиот тим дополнително го сочинуваат – Јордан Смилевски, во процес на стекнување А-лиценца, Дарко Николов и Марио Митев, носители на C-лиценца и во процес на добивање B-лиценца.
Голем дел од младите фудбалери кои досега беа дел од проектот продолжуваат да тренираат и да се натпреваруваат и понатаму, овојпат под новото име, со јасна стратегија за учество на повеќе турнири, натпреварувања и натамошен индивидуален и колективен напредок.
ФК Марадона Штип ја започнува својата приказна со јасна мисија – создавање здрави спортски навики, правилен фудбалски развој и воспитување на нови генерации фудбалери.
