Меѓународниот турнир во традиционално борење, пехливани, беше успешно организиран вчера и достоинствено затворен, претворајќи го Скопје во неделата во центар на вниманието на овој традиционален спорт.
Во фокусот на борбите беа башпехливаните, каде првото место го освои Турчинот Мустафа Таш, пред својот сонародник Мустафа Бату, додека третото место му припадна на скопјанецот Фати Вејсели, кој имаше одлични настапи против сите противници со кои се соочи.
Посебен момент на турнирот беше и големата победа во втората категорија на младиот скопјанец Шаќир Бислими, кој на турнирот дојде да зеде учество од Дагестан – Русија.
Успешни борби покажаа и Џахид Латифи од Студеничани, кој во истата категорија триумфираше над Турчинот Хидајет Авџи, потврдувајќи го својот висок квалитет и континуиран напредок.
Многу добри настапи имаа и други надежни домашни пехливани како Мејди Бислими, Трим Исмаили, Мухамед Весели и уште неколку имиња, кои оставија позитивен впечаток.
Инаку, турнирот во организација на скопјанецот Татин Ќехаја собра на едно место над 50 борачи од Македонија, како и учесници од Турција, Грција, Азербејџан и Албанија, давајќи му на овој настан јасен меѓународен карактер и достојна завршница на еден голем спортски настан.
