Во стручниот тим на селекторот Гоце Седлоски, како негови асистенти ќе работат: Борче Христов – шеф на стручниот штаб на ФК Тиквеш и директор на Центарот за едукација, Ерхан Селими – досегашен селектор на Македонија до 19 години, и Зоран Бошковски – Чоко, легендарен голгетер и стрелец на првиот гол во историјата на македонската репрезентација.
Дел од стручниот тим ќе биде и поранешниот репрезентативен дефанзивец Ванче Шиков, кој има 58 настапи за Македонија, додека тренер на голмани е именуван Гого Јовчев. Како видео-аналитичар на А репрезентацијата е ангажиран Мартин Христов, а селекторот Седлоски дополнително ќе го соопшти името на кондицискиот тренер кој ќе му се приклучи на тимот.
Со овој состав, Седлоски гради стручен штаб составен од докажани професионалци, со јасна цел – стабилност, континуитет и натамошен напредок на македонската репрезентација.
