Македонската машка ракометна репрезентација го одигра првиот контролен натпревар воочи Европското првенство и загуби од Хрватска со 23-26 во дуел одигран во Пореч.
Овој меч беше прва можност за селекторот Кире Лазаров да ги тестира новите решенија и ротации во составот, особено со оглед дека ривалот настапи без дел од своите носители на играта.
Избраниците на Лазаров добро го започнаа мечот, но серијата промашени пенали во клучни моменти го насочи резултатот во корист на домаќинот. Хрватскиот селектор им даде продолжен одмор на главните ѕвезди, но и покрај тоа Македонија не успеа да ја материјализира иницијативата во одредени делови од дуелот.
Лазаров беше искрен во својата анализа по натпреварот:
„Промашивме пет пенали, три на самиот почеток и со такво нешто не можеш да направиш ништо. Имаме доста проблеми, имаме и многу ‘дупки’, но се обидовме некои работи да ги направиме на најдобар можен начин и да пробаме со нови сили. Ни недостасуваше, на пример, Лазаревски, но тоа е…“, изјави Лазаров.
Селекторот потенцира дека ваквите натпревари имаат развоен карактер — важни се за ритам, искуство и проверка на младите ракометари кои влегуваат во системот на репрезентацијата.
Во продолжение тој порача:
„Продолжуваме со подготовките во Хрватска до 30 декември, потоа одиме во Швајцарија на турнир, па директно на Европското првенство. Нема да биде лесно. Кај нас очекувањата секогаш се големи, ќе беа уште поголеми ако победевме денес, но ќе се бориме“, додаде Лазаров.
Нашиот национален тим продолжува со тренажниот циклус до крајот на декември, по што следи настап на „Жолтиот Куп“ во Швајцарија во втората недела од јануари 2026 година — последна генерална проба пред континенталниот шампионат.
