По девет одиграни кола, успешно заврши турнирот „Струмица Гран При“ во стандарден шах (90 минути плус 30 секунди по потег), на кој настапија вкупно 30 шахисти од регионот.
Со освоени 7,5 поени, првото место и победничкиот трофеј му припадна на Мирко Симеонов, кој уште еднаш ја оправда улогата на прва табла на ШК „Цареви Кули“.
Второто место го освои Ацо Атанасов со 7 поени, кој остана во сериозна трка за врвот сè до последното коло и со своите партии потврди дека припаѓа меѓу најконстантните учесници на ваквите натпреварувања.
На третата позиција заврши младиот Доне Ангелов со 6,5 поени, заокружувајќи одличен настап и испраќајќи јасна порака дека младата шаховска генерација во Струмица веќе бележи конкретни резултати и успешно се наметнува на турнирската сцена.
Турнирот „Струмица Гран При“ уште еднаш понуди квалитетни партии, неизвесна борба и одлична шаховска атмосфера, а организаторите најавуваат продолжување на Гран При серијата и нови возбудувања на шаховските табли во периодот што следува.
