После неочекуваниот пораз на шампионот Форца во последното есенско коло на домашен терен од Астибо, најдобрите играчи решија да се разделат со тимот од Куманово.
Клубот на последниот есенски меч настапи без странците, што се поставува прашањата дали со истите е прекината соработката, но дефинитивно тројца искусни играчи си заминаа од клубот – капитенот Таулант Исмаили, голманот Енсар Фера и Еркан Сефери повеќе нема да го носат дресот на Форца.
Капитенот Таулант Исмаили објави дека си заминува од клубот, притоа истакна дека ова е само едно „довидување“, а не „збогум“.
„Ве информирам дека од денес повеќе не сум дел од ФК Форца. На клубот и на кумановската публика ѝ посакувам сè најдобро и им благодарам за сè. Се надевам дека ова ќе биде едно „Довидување“, а не „Збогум“, вели Исмаили.
Голманот Енсар Фера се заблагодари на клубот, тренерот и играчите за соработката.
„Од денес повеќе не сум дел од Форца. Благодарам на раководството на клубот, тренерот и играчите. Благодарам Форца“, истакна Фера.
Разделбата ја потврди и Сефери, кој се заблагодари за досегашната соработка притоа му посака на клубот и навивачите се најдобро.
„Ве информирам дека денес повеќе не сум дел од ФК Форца. На клубот и на кумановската публика им посакувам сè најдобро и благодарам за сè“, потенцираше Сефери.
Форца по поразот од Астибо што беше големо изненадување, дефинитивно најголемо во есенскиот дел претходно загуби од Проект во Гевгелија со 6:1. Со вакви два порази повеќе од јасно е дека Форца сериозно го загуби чекорот за одбрана на титулата.
Заминувањето на овие искусни играчи е потврда дека тимот е свесен дека битката за одбрана на титулата се губи, а Проект зависи сам од себе и со право на две грешки на деветте пролетни натпревари ќе ја врати титулата во Јосифово.
