По неколкугодишна пауза, Фудбалската федерација на Македонија повторно ќе ја возобнови традицијата на избор и наградување на најдобрите во домашниот фудбал. Манифестацијата „најдобрите во македонскиот фудбал“ повторно ќе стане дел од календарот на ФФМ и ќе им оддаде признание на оние кои оставиле најсилен печат во претходната годината.
Претседателот на ФФМ, Масар Омерагиќ, информираше дека изборот ќе се однесува на најдобрите остварувања во 2025 година, а свеченото доделување на признанијата е планирано да се одржи во првата половина на февруари. Во наредниот период ќе бидат објавени и деталите околу локацијата и концептот на настанот.
Со оваа одлука, ФФМ повторно ќе ги избира најдобриот фудбалер, тренер, фудбалски работник, како и лауреати во повеќе други категории, со што ќе се врати една важна практика која долго време недостасуваше на македонската фудбалска сцена.
Возобновувањето на оваа манифестација се оценува како позитивен чекор и јасна порака дека вреднувањето на трудот, успехот и квалитетот повторно добива свое заслужено место во македонскиот фудбал.
