В сабота ќе се одиграат натпреварите од 11. коло на Втората македонска фудбалска лига, а оваа рунда носи дерби од дното на табелата меѓу Борец и Вардар Неготино, трите бодови силен императив и за двете екипи.
Борец експресно се врати во Втора лига, но како тргнале работита иако е рано може и експресно да се врати во Трета лига – Југ. Велешани имаат лоши резултати кои не им одат во прилог, а тоа беше и причина за тренерска промена, на местото на Љупчо Димитковски – Гања дојде младиот стратег Даниел Стојановски кој успеа да собере пет бодови.
Вардар Неготино победи во првото коло и дури во десеттото коло односно изминатата среда во вонредното 10. коло против Новаци, но дали неготинци се излегуваат од кризата одговор ќе даде натпреварот во Велес. Триумф и три бодови може да бидат знак дека тимот на Горан Тодорчев излегол од резултатската криза и пополека фаќа чекор за средишниот дел од табелата, а со тоа ќе направи разлика од опасната зона.
Борец е претпоследен со пет бодови на своето конто од десет меча има една победа и две ремија, со вкупно седум порази, а статистички Борец го има најлошиот напад со само пет постигнати погодоци, а одбраната е меѓу најлошите односно втора најлоша одбрана со 19 примени погодоци.
Вардар Неготино е на 13-тото место во безбедната зона, место над бараж зоната со осум бодови на своето конто, нападот на Вардар Неготино е далеку подобар со 12 постигнати погодоци, а пак одбраната има примено 16 гола.
Триумф за Вардар Неготино може да значи и скок до 12-тото место односно да заврши пред поранешниот прволигаш Скопје, но доколку „пиратите“ загубат на „Билјанини Извори“. Секако дека солуции прави и Борец, кој доколку победи би имал осум бодови и со тоа ќе се израмни со Вардар Неготино, но ќе го помине Осогово и ќе биде во бараж зоната, всушност Борец и со реми би бил пред Осогово, бидејќи „жетварите“ имаат претешко гостување кај големиот фаворит Башкими во Куманово, каде доколку Осогово извлече бод ќе биде навистина голем резултат како тој против Брегалница во Штип (1:1).
Во однос на меѓусебните дуели на Борец и Вардар Неготино двете екипи од 2018 година досега се соочиле четири пати, од кои трипати во Втората лига еднаш на пријателски меч. Исходот е четири од четири за Борец, па така Вардар Неготино ќе бара прва победа во меѓусебните дуели.
- МЕЃУСЕБНИ ДУЕЛИ БОРЕЦ – ВАРДАР НЕГОТИНО:
29.09.2018: Борец 1:0 Вардар Неготино ВМФЛ
13.03.2019: Вардар Неготино 0:3 Борец ВМФЛ
20.04.2019: Вардар Неготино 0:4 Борец ВМФЛ
04.02.2023: Борец 3:1 Вардар Неготино Пријателски меч
Натпреварот меѓу Борец и Вардар Неготино се игра на Градскиот стадион „Зоран Паунов“ во Велес, дерби од дното за трите бодови, дерби за излез од резултатската криза, но и дерби и три бодови кои на крајот од сезоната може да се покажат како клучни за опстанок во Втората лига. Натпреварот ќе стартува во 13 часот.
