Денес беше назначен Гоце Седлоски за нов селектор на македонската фудбалска репрезентација, а веќе утре ќе следи неговата официјална промоција.
Новиот селектор веќе го екипира стручниот штаб со кој ќе работи, а за прв асистент е назначен Борче Христов, шефот на стручниот штаб на прволигаш Тиквеш.
55-годишен стратег зад себе има богато тренерско искуство. Христов во својата кариера беше тренер на Шкендија, Македонија ЃП, Еуромилк ГЛ, Борец и Работнички во македонскиот шампионат, како и во азербејџанските клубови Карабах и Зира,.
Дополнително, тој беше и спортски директор на академијата на Вардар, како и дел од Одделот за фудбалски развој при Фудбалската федерација на Македонија.
Од прволигаш Тиквеш му посакаа на Христов многу успех како прв помошник на Седлоски.
„Шеф на стручниот штаб на нашиот клуб, Борче Христов денес е назначен за прв помошник на новиот селектор Гоце Седлоски на А-селекцијата на Македонија. Им посакуваме среќна и успешна работа со пласман на Светско првенство 2026“, велат од Тиквеш.
