Вечерва Мал Ајакс забележа голема победа над шампионот Форца среде Куманово во последниот меч од есенската полусезона на Првта футсал лига, откако штипскиот тим славеше со 5:6.
Голема заслуга за овој голем триумф на Мал Ајакс има и голманот Филип Гигов, кој беше вистински „пантер“ на својот гол и имаше фантастични интервенции во клучни моменти од натпреварот што доведе до овој голем триумф.
21-годишниот голман за Спортска Мрежа истакна дека мотивацијата секогаш е на највисоко ниво кога се игра против најдобрите, притоа потенцираше дека докажале дека Мал Ајакс има квалитет за повисок пласман на табелата.
„Секогаш кога се игра со најдобрите мотивацијата е на највисоко ниво, иако сме во долниот дел на табелата сепак не дојдовме со бело знаме и денес докажавме дека нашиот квалитет е за во повисокиот дел на табелата. За моите одлични одбрани голема заслуга имаат и моите соиграчи не е еден херој сите сме херои“, вели Гигов за Спортска Мрежа.
Мал Ајакс есенската полусезона ја завршува со шест бодови и со учинок од две победи и седум порази, а пролетниот дел го отвара против Јувентус Серава во гости.
