Новаци зад себе има исклучително успешна есенска полусезона во Втората македонска лига. Со освоени 27 бодови, преку осум победи, три нерешени средби и четири порази, екипата заслужено ја заврши полусезоната на шестата позиција на таабелата, со одлична гол-разлика од +14 (25 постигнати и само 11 примени голови).
Централна фигура во есенскиот поход на Новаци е Стефан Јовановски (08.01.2000), кој ја игра најдобрата сезона во својата досегашна кариера. Во 15 првенствени натпревари реализираше девет погодоци и запиша пет асистенции, а својот голгетерски учинок го надополни и со еден погодок во Купот на Македонија на еден одигран натпревар.
Континуитетот, зрелоста во играта и влијанието врз офанзивната игра на тимот беа клучни за резултатската стабилност на Новаци. Ваквите настапи не останаа незабележани, па Јовановски веќе се наоѓа на радарот на неколку македонски клубови. Пред него е важна одлука – дали ќе направи чекор напред во кариерата или ќе продолжи да блеска во средината во која моментално се наоѓа, останува да се види.
