Утре, со почеток од 18:00 часот, во рамките на 17. коло од ракометната Супер лига, ГРК Охрид ќе го одигра последниот домашен натпревар за оваа година, кога во „Билјанини Извори“ ќе гостува актуелниот шампион- Еурофарм Пелистер.
По важната победа на гостувањето кај Тиквеш, охриѓани со полн фокус и нетрпение го очекуваат големиот предизвик.
Кружниот напаѓач на Охрид, Иван Тасески, нагласува дека пред тимот е сериозен испит против шампионот, но атмосферата во екипата е позитивна по последниот триумф.
Исто така, тој истакнува дека сите ќе го дадат максимумот за да се претстават во најдобро можно светло и упатува отворен повик до навивачите и љубителите на ракометот да бидат дел од овој ракометен спектакл.
„Во недела го играме последниот натпревар на домашен терен за оваа година. Ни доаѓа актуелниот шампион на Македонија, екипата на Еурофарм Пелистер. После победата во Тиквеш фокусот ни е на овој натпревар. Ќе го дадеме сите максимумот за да се покажеме во што подобро светло на овој натпревар. Ја повикувам навивачката група „Рибари“, љубителите на ракометот, да дојдат во што поголем број да уживаат во овој натпревар“- изјави Тасески.
Неделниот дуел со Пелистер ќе биде вистински тест за ГРК Охрид, а поддршката од трибините ќе има посебна тежина на последниот домашен настап за оваа година во „Билјанини Извори“.
