Градоначалникот на општина Босилово, Ристо Манчев, оствари работна средба со претседателот на Општинскиот фудбалски сојуз на Струмица, Илија Илиев – Рома.
Разговорот беше во насока на продлабочување на соработката и унапредување на фудбалските активности во општината. Фокусот на средбата беше ставен врз функционирањето на Општинската фудбалска лига, развојот и поддршката која Босилово ја обезбедува за локалните фудбалски колективи – ФК Хоризонт Турново, ФК Напредок Радово и ФК Дрвош – како и планираните општински инвестиции во спортската инфраструктура.
Градоначалникот Манчев истакна дека стимулирањето на спортот и младите е врвен приоритет за општината, со јасна порака и охрабрување до сите населени места.
“Денес остварив средба со претседателот на Општинскиот фудбалски сојуз Струмица, дел од Фудбалската федерација на Македонија, Илија Илиев. Разговаравме за соработката во општинската фудбалска лига, поддршката која општина Босилово ја дава на ФК Хоризонт Турново, ФК Напредок Радово и ФК Дрвош и за идните инвестиции кои општината ќе ги спроведе во спортската инфраструктура. Спортот и младите се врвен приоритет на нашата општина, затоа ги повикувам и другите населени места да формираат фудбалски клубови кои ќе се натпреваруваат во Општинската фудбалска лига, а Општина Босилово останува партнер и поддржувач за сите клубови”, рече градоначалникот Манчев.
Општина Босилово и понатаму останува отворена за иницијативи и проекти кои значат развој на спортот и создавање подобри услови за младите спортисти.
