Кошаркарскиот клуб Работнички добива сосема нов, современ дом – реконструираната сала во „Градски парк“ е пред финализирање и наскоро ќе биде целосно усогласена со сите ФИБА стандарди. Ова го потврди градоначалникот на Општина Центар, Горан Герасимовски, кој денеска направи обиколка на објектот заедно со клубските легенди Митко Луковски и Огњан Герасимовски.
Во салата се изведуваат последните работи, а најзначајниот дел – новиот паркет од 700 м² – ќе биде целосно поставен следната недела. Паралелно се доинсталираат семафорите, додека осветлувањето и озвучувањето се веќе завршени.
Објектот добива и нови трибини во традиционалните црвено-бели бои на Работнички, како и модерни соблекувални, судиски простории, медицинска и допинг-контрола.
Салата станува целосно енергетски ефикасна благодарение на подното греење и современиот систем за греење, ладење и проветрување, а поставени се и инклузивни тоалети со пристапна рампа, со што објектот добива и важна социјална функционалност.
„Поставуваме нов паркет на теренот од 700 м², кој веќе следната недела ќе биде целосно завршен. Во тек е и доинсталација на семафорите, додека осветлувањето и озвучувањето се веќе финализирани. Салата е целосно енергетски ефикасна, со подно греење, современ систем за ладење, греење и проветрување, нови трибини, црвено-бел амбиент во боите на КК „Работнички“, соблекувални, простории за судии, медицинска и допинг-контрола, како и инклузивни тоалети со пристапна рампа. Ова не е само реконструкција – ова е ново поглавје за „Работнички“ и за спортот во Центар. Со мене на обиколката беа и легендите на „Работнички“, Митко Луковски и Огњан Герасимовски, кои ја поздравија реализацијата на проектот“, вели Герасимовски.
Со ова реконструкција, Работнички добива врвни услови за тренинг и натпревари, а реновираниот објект претставува силен чекор напред за македонската кошарка и спортот во општината Центар.
