Второлигашот Големо Коњари јавно им се заблагодари на сите жители од селото за масовниот одзив и искрената поддршка во акцијата за собирање тутун – традиционален начин на помош што повторно ја покажa сплотеноста на заедницата.
Иако екипата моментално е последна на табелата со само три бода, љубовта кон клубот не слабее. Жителите донираа онолку колку што можат – некој финансиски, некој со тутун – но секој со истата желба: ФК Големо Коњари да опстои и чесно да ја заврши сезоната во Втора лига.
Клубот го водат поранешни спортски работници и ентузијасти кои без спонзори и со големи тешкотии го одржуваат функционирањето. „Тешко е, маки и маки, но ќе ја изиграме сезоната чесно и постено“, истакнува клубот, за Спортска Мрежа.
Оваа година е собран рекорден тутун – двојно повеќе од претходните сезони. Мештаните знаат дека тоа е само мал дел од вкупните трошоци потребни за второлигашки клуб, но нивната поддршка е огромна и искрена. „Секој сака да помогне, сите стојат зад екипата“, додаваат од клубот.
ФК Големо Коњари уште еднаш им се заблагодарува на сите и истакнува дека оваа заедничка акција е доказ дека кога целата заедница стои зад својот клуб – борбата никогаш не запира.
