Охрид во вторник ќе ја продолжи својата импресивна резултатска серија во рамки на вонредното 14. коло од Втората лига, каде на „Билјанини Извори“ ќе го пречека Детонит Плачковица. Ова е претпоследно есенско коло, а охриѓани влегуваат како фаворити со пет последователни триумфи и сериозна игра што ги врати во самиот врв на табелата.
Радовишани, пак, ќе се обидат да „го препливаат Охридското Езеро“ и да се вратат дома со бодови – нешто што ниту една екипа не успеа да го направи – „рибарите“ дома немаат пораз.
Тренерот на Охрид, Ромео Кочоски, за Спортска Мрежа го најави овој важен натпревар и ја истакна амбицијата за продолжување на победничкиот ритам.
„Играме во добра форма, врзавме пет последователни победи. Во вторник ја пречекуваме екипата на Детонит Плачковица, доста добра и цврста екипа, која сезонава одигра доста квалитетни натпревари. Но нашите планови и амбиции оваа година се високи па во вторник нема да калкулираме и ќе го дадеме максимумот за да ја забележиме и шестата победа по ред ,а со тоа и да останеме во врвот на табелата“, изјави тренерот на Охрид, Ромео Кочоски за Спортска Мрежа.
Со играта што ја покажуваат последните недели, Охрид влегува во дуелот како тим во најдобра форма во лигата. Шестата победа по ред би значела огромен чекор кон тоа Охрид да биде есенски шампион, дополнителна потврда дека охриѓани имаат сериозни амбиции оваа сезона – влез во Прва лига.
