По големиот тимски успех на македонската женска кошарка, вечерва на натпреварот со Грција беше испишана уште една историја. Постигнат е нов поентерски рекорд во сениорскиот состав.
Анџелика Митрашиновиќ со 23 поени на дуелот со Грција стана најдобар стрелец во историјата на женската сениорска репрезентација на Македонија. Со вкупно 419 постигнати поени, капитенката ја надмина легендарната Моника Гавриловска, која во својата кариера има 403 поени на 28 натпревари.
„Не знам навистина што да кажам, што да додадам на оваа ваша констатација. Нормално дека ми е драго кога ќе го чујам тоа. Макар, еве досега, до овој момент не ни помислив, не сум ни размислувала за една ваква работа, … Сепак, тоа е еден огромен успех, на личен план. И да, не сум навикната да зборувам, лично за себе, подобро е другите да зборуваат, оценуваат, коментираат… “- изјави капитенката Митрашиновиќ.
Митрашиновиќ вечерва го одигра својот 33. во дресот на Македонската репрезентација, а овој рекорд од меч во меч ќе продолжи да расте, поставувајќи висока летвица за генерациите што доаѓаат.
