Женската кошаркарска репрезентација на Македонија доживеа пораз од Грција со 84-101 во вториот квалификациски меч за Европското првенство 2027, одигран во СРЦ „Кале“ во Скопје.
По историската победа над Данска – прва по 17 години – нашите кошаркарки тргнаа мотивирано и одиграа одлични први десет минути (23-23). Но во втората четвртина следеше пресврт: Грција постигна високи 36 поени и стигна до предност од 20 поени на полувреме (39-59).
Гостинската селекција во второто полувреме се одлепи и до +27 (45-72), но Македонија ја покажа борбеноста и во финишот намали на само осум поени негатива (82-90). Сепак, во последните минути постигнавме само два поени, по што гркинките славеа убедливо.
Во нашата репрезентација најрасположена беше капитенката Анџелика Митрашиновиќ со фантастични 23 поени, 9 скока и 10 асистенции. Илина Селцова уфрли 19 поени, Мерит Хемпе 16, а Ивана Кметовска 10. Во репрезентацијата на Грција пак најдобри беа Мариа Фасула со 22 и Елеана Кристинаки со 21 поен, и Спаноа со 15 поени.
