Могила во рамки на 9. коло од Трета лига – Југозапад ќе ја пречека екипата на Демир Хисар, во недела со почеток од 14:00 часот на стадионот „Димко Сарванов“. Натпреварот ветува интересна борба, со оглед дека двата тима се соседи на табелата – Могила е шеста со 12 бодови, додека Демир Хисар е петти со 13 бодови.
Еден од најзаслужните за освоениот бод во дербито против Кравари беше младиот голман на Могила, 19-годишниот Дарио Велевски, кој блескаше со серија одбрани и ја сочува својата мрежа недопрена.
„Од натпревар во натпревар сè повеќе се консолидираме. Одигравме веќе седум натпревари, од кои дури пет на гостински терен, и имаме само еден пораз што многу радува. На последниот натпревар покажавме карактер и зрелост, докажувајќи дека, иако сме млада екипа, знаеме како да се носиме со предизвиците и да освојуваме бодови. За неделниот натпревар посакувам повторно чиста мрежа, но најважно е да ги освоиме трите бодови на домашен терен, каде одамна не сме настапиле, очекувам сигурна победа и уште еден чекор поблиску кон нашиот сон, пласман во повисок ранг,“ – изјави младиот голман Дарио Велевски.
Публиката во Могила со нетрпение го очекува натпреварот, а атмосферата на трибините сигурно ќе биде дополнителен мотив за фудбалерите во потрагата по нова победа.
