Македонските одбојкарски претставници Струмица 47&72 и Штип УГД ги започнаа настапите во европските клупски натпреварувања со порази, но и со борбени изданија кои најавуваат дека ќе бидат сериозни ривали во реваншите на домашен терен.
По елиминацијата од квалификациите за ЦЕВ Лигата на шампионите, струмичани ги продолжија настапите во ЦЕВ купот, каде во првиот меч од првата рунда загубија со 3:0 (25:18, 25:12, 26:24) на гостувањето кај Јихострој Чешке Будејовице во Чешка.
Иако резултатот не го покажува тоа, македонскиот шампион прикажа солидна игра, особено во третиот сет кога недостасуваше малку за да се освои период. Филип Маџунков беше најистакнат со 10 поени, Јован Милев запиша 9, а Владо Милев и Кристијан Илијев по 6.
Реваншот ќе се одигра на 19 ноември од 19:00 часот во салата Парк во Струмица.
Во ЦЕВ Челинџ купот, Штип УГД го одигра своето европско деби со голема борба и натпревар кој траеше речиси два часа (117 минути), но на крај загуби со 3:1 (35:33, 22:25, 25:18, 25:23) на гостувањето во Осло кај Кол Ил.
Во маратонскиот прв сет штипјани не искористија шест сет топки, а во продолжението се играше рамноправно, но домаќините беа посконцентрирани во завршниците.
Најрасположени кај Штип УГД беа Махди Задмард со 20 поени, Леандро Оливеира со 18, Стојан Илиев со 14 и Стефан Алексов со 11.
Реваншот ќе се одигра на 19 ноември од 19:00 часот во спортскиот центар 25 Мај во Радовиш.
