Вечерва во Скопје, женската кошаркарска репрезентација на Македонија забележа минимална, но голема победа во квалификациите за Евробаскетот кој ќе се игра во 2027 година со резултат од 79:78.
Една од нашите најискусни кошаркарки, Александра Стојановска, вели дека заслужено го добиле мечот, со борба од првата до последната секунда.
„Пред се, честитки до мојата екипа. Се боревме, покажавме дека можеме од самиот старт и како што ни рече тренерот на почетокот, го покажавме тој победнички менталитет. Заслужено го добивме овој дуел, со борба од прва до последна секунда. Секој што стапна на терен даде максимум и даде свој придонес во оваа прва победа. Ова е само почеток на нешто добро и убаво во нашата репрезентација.
За следниот меч ќе се подготвуваме добро, Грција е тежок и искусен ривал, долги години игра на Европските првенства. Но секако дека нема да се откажеме и ќе се бориме да покажеме дека можеме“- потенцираше нашиот репрезентативен бек по особено важниот триумф на стартот на квалификациите.
