Македонскиот првак Еурофарм Пелистер се подготвува за еден од најтешките натпревари оваа сезона во Лигата на шампионите – дуелот против унгарскиот ПИК Сегед, кој ќе се одигра вечерва од 20:45 во салата „Боро Чурлевски“. Тимот на Гарабаја пристигнува со цел да ги искористи домашните бенефити и да ја направи својата игра што поефикасна, и покрај квалитетот на противникот.
Тренерот Рубен Гарабаја го најави дуелот со пофалби за Сегед, но и со сигурност во своите играчи:
„Ќе имаме нов тежок меч во Лигата на шампионите, Сегед е одличен тим со неверојатни играчи на сите позиции. Одбраната им е гранитна, шутираат од секаде, особено од далечина. Во екипата е еден одличен голман и можеби едно од најдобрите крила во натпреварувањето, но ние ќе се обидеме да им ги поматиме сметките. Се надевам дека тимот наскоро ќе биде комплетен, тоа ќе биде одлично за нас. Против ПИК Сегед ќе го дадеме нашиот максимум, мојата порака до фановите е дека ќе видат борбен тим со желба за победа.“- изјави тренерот на Пелистерци.
Се очекува динамичен и возбудлив дуел, а тренерот Гарабаја е уверен дека Еурофарм Пелистер ќе даде максимум и ќе се обиде да ја изненади гостинската екипа, пред својата публика во Битола.
