Женската сениорска кошаркарска репрезентација на Македонија денес попладне го започнува новиот квалификациски циклус со натпревар против селекцијата на Данска. Средбата ќе се одигра од 17 часот во салата на СРЦ „Кале“ во Скопје.
Селекторот Александар Ашаданов конечно може да смета на комплетен состав. Во екипата се приклучија „Италијанките“ Матеа Никколиќ и Тијана Митрева, а во составот се врати и Ивана Кметовска, исклучително важен играч во концептот на македонската репрезентација. Таа успеа да ги заврши приватните обврски и повторно ќе биде дел од тимот за овој мини-циклус.
По денешниот дуел со Данска, нашите кошаркарки ќе играат и против Грција на 15 ноември (од 18 часот, исто така во „Кале“), а потоа и против Хрватска.
Капитенот Анџелика Митрашиновиќ, лидер на селекцијата и главен мотор на тимот, очекува позитивен старт и верува дека Македонија може да дојде до победа.
„Нормално е дека одиме со очекувања за победи на секој меч. Оптимизмот секогаш ни е на највисоко ниво, така треба и да биде кај секој спортист. Реално, Гркинките се високо рангирани и со нив ќе биде тешко, но со Данска очекуваме еден добар меч во кој ќе напаѓаме триумф“, изјави Митрашиновиќ.
Таа додава дека секоја победа носи голема доза самодоверба, многу важна во период кога репрезентацијата ќе одигра три натпревари за кратко време.
„Ако оствариме една победа, самодовербата ќе ни биде поголема и ќе очекуваме повеќе од себе и од тимот. Верувам дека можеме да ја победиме Данска, особено затоа што нивната најдобра кошаркарка е бремена и нема да настапи. Иако сме подмладени, ако ја споиме младоста со искуството и внесеме позитивна енергија, можеме да извадиме добар резултат“, додаде капитенот на Македонија.
