Фудбалската репрезентација на Шведска до 21 година денеска го одработи својот официјален тренинг на теренот во Црнобуки, подготвувајќи се за квалификацискиот дуел со Македонија кој ќе се одигра на 13 ноември на стадионот „Петар Милошевски“ во Битола.
Иако првично беше предвидено подготовките да се одржат во Големо Коњари, поради неповолни временски услови и влажност на теренот, Швеѓаните се решија за Црнобуки, каде што ги дочекаа одлични услови, уреден терен и топло добредојде од локалното население.
Тренингот помина во одлична атмосфера и без проблеми, а селекторот на шведската репрезентација изрази задоволство од условите и организацијата.
Голем број жители од селото и околината со интерес го следеа тренингот, создавајќи вистински спортски амбиент и момент кој долго ќе се памети.
Со тоа, Црнобуки уште еднаш ја потврди својата репутација како место кое живее за спортот и фудбалот, а успешната реализација на тренингот на младата шведска репрезентација претставува голема чест и гордост за целата битолска општина.
