Прволигашот Тиквеш од Кавадарци го најавува одржувањето на 25-тото издание на традиционалниот Меморијален турнир „Вуко Каров и Тиквешките легенди 2025“, кој ќе се одигра во четврток, на 13 ноември 2025 година, на Градскиот стадион во Кавадарци, со почеток во 11:30 часот.
Овој турнир претставува длабоко вкоренета спортска традиција во Кавадарци, на која се оддава почит на легендарниот Вуко Каров и на сите фудбалери кои оставиле белег во историјата на тиквешкиот фудбал. Овојпат, учество ќе земат три добро познати екипи – домаќинот ГФК Тиквеш 1930, ФК Тетекс 1953 од Тетово и ГФК Вардар Неготино.
Организаторите најавуваат вистински фудбалски спектакл и пријателска атмосфера исполнета со спортски дух, традиција и спомени на генерации фудбалери кои ја граделе историјата на Тиквеш.
„Ги покануваме сите љубители на фудбалот да присуствуваат и заедно да ја проследиме оваа убава традиција. Ве очекуваме на Градскиот стадион Тиквеш во Кавадарци“, порачуваат од ГФК Тиквеш 1930 АД.
