Наместо во Големо Коњари, репрезентацијата на Шведска до 21 година ќе го одржи својот официјален тренинг во Црнобуки, битолско село познато по одличниот фудбалски терен и љубовта кон спортот.
Поради лошите временски услови и влажноста на теренот во Големо Коњари, младите Швеѓани ќе тренираат токму во Црнобуки, каде што се создадени сите услови за нивна добра подготовка пред квалификацискиот дуел против Македонија за Европското првенство 2027.
Тренингот ќе биде вистинска атракција за локалните жители и фудбалските ентузијасти, кои со голема радост ќе можат да ги проследат идните ѕвезди на шведскиот фудбал во своето село.
„Ни претставува задоволство што ќе бидеме домаќин на респектабилен национален тим и фудбалска земја.
По тој повод сакаме да изразиме благодарност до Фудбалската федерација на Македонија и претседателот Масар Омерагиќ, Општинскиот фудбалски сојуз и претседателот Златко Талевски, како и директорот на У21 репрезентацијата Ѓорѓи Христов“, велат домаќините.
Шведска У21 ќе тренира во Црнобуки во пресрет на натпреварот со Македонија, кој ќе се одигра на 13 ноември во Битола, на стадионот „Петар Милошевски“.
Овој настан претставува голем момент за спортската заедница во Црнобуки, која уште еднаш покажува дека малите средини можат да бидат домаќини на големи европски фудбалски селекции.
