Македонската репрезентација до 21 година од денеска го започна подготовките во Охрид за претстојните натпревари во квалификациите за Европското првенство.
Селекторот Горан Станиќ веќе го одржа првиот тренинг со своите избраници, а репрезентативците во наредните денови ќе продолжат со интензивни подготовки за соочувањата со Шведска и Полска, кои ќе се играат на стадионот „Петар Милошевски“ во Битола.
Македонскиот тим го очекуваат два тешки дуели, особено против Полска, која досега во квалификациите има максимален учинок – на четири натпревари постигнала 15 голови и не примила ниту еден. Првиот противник ќе биде Шведска, која доаѓа со три порази во низа. Во мечевите против Полска, Италија и Црна Гора, Швеѓаните примиле 12 голови, а не постигнале ниту еден.
Целта на нашиот тим е јасна – освојување бодови за подобрување на моменталната позиција на табелата. Досега, Македонија има една победа од четири натпревари, а првите бодови ги освои на домашен терен против Ерменија со 2:1.
Првиот натпревар го играме во четврток на 13 ноември против Шведска, а пет дена подоцна со селекцијата на Полска.
И двата натпревари ќе се играат на стадионот Петар Милошевски во Битола со почеток од 17:00 часот.
