Вардар Брвеница загуби на домашен терен, Камјани, Напредок и Влазерими до три бода!

Денес се комплетираше 8. коло во Третата македонска фудбалска лига – Запад. Колото беше отворено вчера со два натпревари, а денес беа одиграни уште три. Во ова коло, слободна беше екипата на Ренова, откако Зајас се откажа од понатамошното натпреварување.

Вчера во Кичево, Напредок со 2-0 славеше над Љуботен. Стрелци на головите беа Осман Исмаили во 15. минута и Мојсеј Зафировски во 36. минута, за сигурна победа на некогашниот прволигаш.

Во вториот натпревар одигран вчера, Речица и Камјани одиграа вистински трилер со дури седум погодоци, а гостинот славеше со резултат 3-4.

Херој за гостинскиот тим беше Хузри Џемаили со три гола, а еден гол постигна Арлинд Берзати. За домашниот тим стрелци беа Мубарек Шасивари и Адхурим Иљази во првиот дел, а во второто полувреме гол постигна Мухамед Адеми.

Вардар Брвеница загуби на домашен терен од тимот на Џепчишти со резултат од 2:3. Даниел Радески во 6. минута го отвори резултатот, а гостинот преку Шпат Абдии и Ебубекир Азиз во 41. минута имаше 1:2 на полувреме. Во вториот дел Агон Селмани ја зголеми предност на 1:3, а во 89. минута Ивица Костадиноски ги постави конечните 2:3.

Арлинд Бајрами обезбеди три бода за Скендербеу кој славеше со 1:0 над Доброшти на домашен терен во Порој.

Влазерими преку пресврт со 4:2 ја доби Дрита на домашен терен во Кичево. Мефаил Алимани во 5. минута го отвори мечот, а потоа Мирлинд Ибраими и Мурат Адили направија пресврт на 2:1. Во 30. минута Артан Синани погоди за 2:2. До крајот на првиот дел Велезерим Ајдини и Дрилон Зендели ги поставија конечните 4:2.