ФОТО: Боризоска носи победа за Скопје на гостувањето во Струмица, шампионот убедлив, три бода за Истатов!

Денес се одиграа натпреварите од 12. коло во Првата женска фудбалска лига, а голови имаше на сите мечеви.

Во Струмица, дербито меѓу Тиверија Брера и Скопје го реши само еден погодок. Херојка на гостинките беше Ана Боризоска, која во 72. минута погоди за конечни 0-1. Натпреварот понуди шанси на двете страни, но повеќе среќа имаше тимот на Скопје, кој со оваа победа останува во трката со лидерот и актуелен шампион Љуботен.

Минимална победа со ист резултат запиша и Речица, која на гостувањето во Битола ја совлада Топ Гол со 0-1. Решавачкиот погодок го постигна Марија Анческа во самиот финиш на првото полувреме (45’).

Во Каменица, Саса го доби дербито против АС Јунајтед, славејќи со 2-0. По мирното прво полувреме, во вториот дел капитенот Ана Димитровска погоди за водство, а во самиот финиш Тчеури Харуми Гоја ги постави конечните 2-0.

Ист резултат имаше и во Пржино, каде Истатов со 2-0 го совлада Вардар. Домаќинот кој на себе ја имаше фаворитската улога, истата ја оправда со погодоците на Ива Здравевска и Радица Чонева.

Актуелниот шампион Љуботен сосема очекувано славеше убедлива победа од 0-7 на гостувањето кај „фенерџијата“ Кочани. Тимот од Тетово уште еднаш ја потврди доминацијата – двојни стрелци беа Елена Симјанова, Ајури Тераваки и Мариан Огочукву Охадиве, а еден погодок додаде Меланија Гроздановска.