Дебитантскиот настап во Европа за ОК Наковски Волеј завршува по само два натпревари во ЦЕВ Челинџ купот, откако струмичкиот состав вечерва беше поразен со 0:3 (15:25, 21:25, 15:25) од чешката Острава во салата „Парк“.
Иако против себе имаа поискусен и физички помоќен противник, избраничките на Александар Митев одиграа борбено и мотивирано пред домашната публика. Најавија дека ќе пружат посилен отпор – и тоа го исполнија, но младоста и неискуството си го направија своето.
Во напаѓачкиот дел најрасположени беа Лиља Ковачевиќ, Сара Марковиќ, Ивана Милева и Ива Стојкоска, кои реализираа по седум поени, додека Мила Долдурова придонесе со четири.
Иако елиминацијата значи крај на европскиот сон за оваа сезона, искуството од двата натпревари ќе биде огромен капитал за младата екипа на Наковски Волеј во понатамошниот развој и настапите на домашната сцена.
Покрај струмичанки, и Работнички Скопје претходно го заврши настапот во истото натпреварување – ЦЕВ Челинџ купот, третото по квалитет европско клупско натпреварување во одбојката.
