Младиот каратист Марко Џорлев, член на карате клубот Штип, оствари нов голем успех на меѓународната сцена, освојувајќи два златни медали на престижниот турнир „Дојран Опен 2025“, кој се одржа во Спортскиот центар „Истатов“ во Нов Дојран.
Џорлев дојде до првото злато во својата категорија кадети до 63 килограми, каде што славеше во три борби, совладувајќи двајца македонски каратисти и еден натпреварувач од Бугарија.
Организаторите му овозможија настап и во повозрасната категорија јуниори до 61 килограм, каде младиот штипјанец уште еднаш докажа дека е во врвна форма. Во финалето против борач од Бугарија, Џорлев извојува убедлива победа со резултат 3:0, со што стигна до втората златна медала на турнирот.
На „Дојран Опен“ учество зедоа каратисти од Македонија, Бугарија, Грција, Црна Гора, Босна и Херцеговина и Косово, а младиот каратист Марко Џорлев е задоволен од своите настапи.
„Среќен сум што успеав да ги освојам двете злата, особено бидејќи конкуренцијата беше силна. Следниот предизвик е Државното првенство на 15 ноември, кое е изборно за Европското првенство во Лимасол, Кипар, што ќе се одржи во февруари 2026 година“, изјави Џорлев по турнирот.
Со ваквите настапи, младиот шампион од Штип уште еднаш покажа дека е еден од најперспективните каратисти во својата генерација, и дека Македонија може да очекува нови успеси на меѓународната сцена.
