Женската екипа на Работнички Скопје, третиот македонски претставник во европските клупски купови, денес ќе го одигра двомечот од првото коло на ЦЕВ Челинџ купот против естонскиот РАЕ Спортдикол.
Македонките веќе пристигнаа во градот Јури, каде вчера го одработија и првиот тренинг. Првиот натпревар се игра денеска од 18 часот по македонско време, а Работнички на хартија ќе биде условен домаќин. Естонскиот шампион важи за фаворит, но избраничките на Душко Деспотовски најавуваат дека нема да се предадат и ќе се борат за секој поен.
„Со двата натпревари против РАЕ Спортдикол во Естонија, Работнички Скопје го продолжува континуитетот со настапи на европската сцена петта година во низа. Се соочуваме со сериозна и искусна екипа, која е шампион во естонското првенство, а истовремено и освојувач на Балтичката лига, како и на Балтичкиот Суперкуп од пред еден месец. Тимот е составен од искусни и квалитетни играчи, четири од нив се репрезентативки на Естонија, земја во која се игра квалитетна одбојка. Максимално сме подготвени, но и внимателно влегуваме во овој двомеч, во кој и ние како екипа имаме свои адути. Верувам дека со максимално залагање, почитување и исполнување на тактичките замисли, дисциплинирана игра и борба за секој поен, можеме да дојдеме до позитивен резултат и да направиме еден голем исчекор напред на европската сцена“, позитивно размислува стратегот на Работнички Скопје, Душко Деспотовски.
Работнички во Челинџ купот влегува со одлична форма и четири победи на домашната сцена, што дополнително го подигнува оптимизмот во таборот на „црвено-белите“. Целта е позитивна игра и резултат што ќе ја продолжи успешната низа и на европско тло.
