Вечерва се одиграа три натпревари од 2. коло на Првата футсал лига, а кое коло донесе две убедливи победи и едно реми со четири погодоци.
Екипата на Проект го одигра првиот меч од новата сезона, откако нивниот меч од првото коло беше одложен поради обврските на шампион Форца во Лигат на шампиони.
Проект имаше фуриозен старт на сезоната откако на гостување кај Јувентус Серава славеше со убедливи 0:8. Во меч на тотална доминација искусниот Мартин Тодоровски запиша хет-три, Горан Стојанов беше двоен стрелец, а по еден гол постигнаа Кристијан Гавровски, Никола Анчевски и Наум Блажевски.
Убедлива победа однесе и тимот на Кеги Моби, откако на домашниот терен во Велес со 5:1 го декласираше Осогово од Крива Паланка.
Прво неизвесно полувреме, а второ полувреме во знакот на доминацијата на домаќинот. Димче Андов уште во 1. минута го отвори резултатот за водство на домашниот тим, а веќе во 3. минута Давид Ристовски погоди за 1:1. По десет минути игра Андов со втор гол го врати водството на домаќинот, кој на полувреме имаше 2:1.
Во вториот дел Стефан Димовски, Петар Левков и Иван Наунов беа прецизни за конечни 5:1.
Дербито во Скопје меѓу Бутел и Шкупи заврши без победник, двете екипи ги поделија бодовите откако одиграа 2:2. Гостинот имаше два гола предност по девет минути игра преку Абдил Кадир Јахја и Љавдрим Фазлију, а во 11. минута Петар Лазовски погоди за 1:2 на полувреме.
Во вториот дел Владимир Трендафиловиќ беше прецизен за конечни 2:2 и делба на бодовите.
Во саботата екипата на Балкан на домашен терен славеше против Мал Ајакс со 7:5, извештајот од овој меч е достапен овде, а колото ќе се комплетира со одложениот меч меѓу Форца и Клими од Кавадарци.
