Фудбалот не е само игра за Бунеј Ебиби, туку начин на живот и остварување на детскиот сон. Младиот талент од гостиварското село Неготино со својата упорност, дисциплина и љубов кон фудбалот успеа да го привлече вниманието на тренерите на еден од најголемите клубови во светот – Барселона.
Во мај годинава, на кампот што каталонскиот гигант го организираше во Приштина, Бунеј Ебиби се издвои меѓу стотиците учесници со својата техничка подготвеност и брзина, што му донесе место меѓу најдобрите млади фудбалери. Неговата игра не помина незабележано – следуваше официјална покана од големиот каталонски гигант, каде младиот фудбалер доби можност да тренира под надзор на стручњаците од славната „Ла Масија“.
Во моментов, Бунеј настапува за ФК Беса, каде што игра на позицијата лево крило. Познат е по својата експлозивност, креативност и голема посветеност на теренот – квалитети што го издвојуваат како еден од најперспективните млади фудбалери во Македонија.
Неговата приказна е инспирација за многу млади таленти – доказ дека со труд, верба и вистински ментори, дури и сонот за Барселона може да стане реалност.
