Македонскиот женски одбојкарски првак Јанта Волеј Кисела Вода направи историски успех со пласман во третата рунда од квалификациите за ЦЕВ Лигата на шампионите. Дебитантот на европската сцена не само што успешно ја мина првата пречка – босанскиот претставник Гацко – туку тоа го направи со две победи со идентични 3:2.
Најсветла точка во двата натпревари беше репрезентативката Мери Бошковска, која беше прогласена за најдобра одбојкарка и на домашниот и на гостинскиот дуел.
По триумфалното враќање во Скопје, екипата на Јанта Волеј се обидува да ги смири емоциите и да се фокусира на претстојните предизвици. Тимот веќе за викендот ќе се врати на обврските во националното првенство, а во продолжението од европската кампања го очекува уште потежок противник.
„Многу ме радува големата победа над Гацко и пласманот во следната рунда од квалификациите за Лигата на шампионите. Чест ми е што бев прогласена за најкорисен играч на двата натпревари. Иако се работи за индивидуална награда, јас на неа гледам како признание за целиот тим – за нашата борбеност, пожртвуваност и истрајност. Покрај осцилациите и тешките моменти, покажавме карактер и успеавме да испишеме историски успех за македонската женска клупска одбојка,“ изјави Мери Бошковска, лидерот на Јанта Волеј КВ.
Во третата квалификациска рунда, македонскиот првак ќе се соочи со француската екипа Волеро ле Кане, која важи за еден од најсилните клубови со квалитетен ростер и бројни странски засилувања.
„Двомечот со Волеро ле Кане ќе биде голем предизвик за нас. Ќе се обидеме да го извлечеме максимумот од нас и да уживаме во секој момент на теренот,“ додаде Бошковска.
Првиот натпревар е закажан на 13 ноември во Франција, додека реваншот ќе се одигра една недела подоцна во Скопје, каде што македонските шампионки ќе имаат шанса да продолжат со својата европска бајка.
