Фудбалерите на Струга Трим Лум остварија значаен триумф во рамките на 11. коло од Првата македонска фудбалска лига, совладувајќи го Шкупи со резултат 1-2, и покрај тоа што повеќе од половина час играа со фудбалер помалку. Со овие три бода, стружани повторно се вратија на врвот на табелата.
Натпреварот, кој поради суспензијата на чаирскиот стадион се одигра токму во Струга, започна со офанзивна игра на избраниците на Бледи Шкемби. Домашниот терен им донесе дополнителна сигурност, а по неколкуте промашени прилики, Басиру Компаоре во 24. минута ја искористи нафрлената топка од Воша и со прецизен удар ја затресе мрежата на Гроте за 0-1.
Во второто полувреме, Шкупи се разбуди и тргна по израмнување. Во 56. минута беше досуден пенал по интервенција на ВАР, а Ласана Дијако доби директен црвен картон поради повлекување на противникот во шеснаесетникот. Капитенот Сухељ Муарем беше прецизен од белата точка и израмни на 1-1.
Иако со играч помалку, Струга не се предаде. Во 74. минута следеше нов пенал, овојпат за стружани, по игра со рака на еден од дефанзивците на Шкупи. Одговорноста повторно ја презеде Компаоре, кој со сигурен удар го совлада Гроте и донесе ново водство од 1-2, што подоцна се покажа и како конечен резултат.
Со овој натпревар, Компаоре стигна до 11 погодоци сезонава, потврдувајќи ја својата извонредна форма и статус на клучен играч во тимот на Шкемби.
Во следното коло, Струга Трим Лум ќе гостува кај Македонија ЃП, додека Шкупи ќе го пречека Силекс во обид да ја прекине серијата на слаби резултати.
