Нашата најдобра таеквондо натпреварувачка Милијана Рељиќ го освои деветтото место на Светското првенство Г-14 кое се одржа во Вукси, Кина.
Благодарение на високата позиција на ранг-листата, Рељиќ беше слободна во првото коло, а во второто ја совлада Бразилката Селидиене Карнеиро. Во борбата за пласман меѓу најдобрите осум, таа беше поразена од домашната натпреварувачка Ксимин Чен.
Според тренерот Александар Ефтимов, резултатот не ја отсликува реалната состојба, бидејќи борбата била под влијание на нефер судиски одлуки, а Мила настапила и со повреда добиена во претходниот меч.
Да не се здобиевме со силната повреда против Бразил, ќе имавме многу подоминантна борба против Кина и сигурно ќе стигневме до медал. Мила едвај можеше да се движи, но за среќа имавме три часа пауза за малку да се опорави. Со десната нога речиси не можеше ниту да удри, па направивме тактика само со лева нога и со боксови. Првата рунда беше нерешена, но судиите не доделија ниту еден поен за шест чисти удари со рака, кои не ги регистрира електронскиот систем, туку страничните судии – изјави Ефтимов.
Со освоеното деветто место, Рељиќ доби 21.17 поени за олимписката ранг-листа во квалификациите за Летните олимписки игри Лос Анџелес 2028.
Овие бодови ја позиционираат меѓу 20 најдобри натпреварувачки во светот, а целта е да остане во првите 32 до јуни 2026 година, што ќе и овозможи настап на четирите Гранд при Г-6 турнири, кои носат значителен број бодови за олимписка норма.
