Претседателот на Фудбалската федерација на Македонија (ФФМ), Масар Омерагиќ, е именуван за член на Олимпискиот фудбалски комитет на ФИФА – тело кое функционира под покровителство на Советот на ФИФА и има клучна улога во развојот и координацијата на фудбалот во рамки на Олимписките игри.
Комитетот, со кој претседава Самир Шауд од Бразил, има задача да соработува со Меѓународниот олимписки комитет (МОК) во сите прашања поврзани со организацијата и промоцијата на фудбалот на Олимпијадите. Заменик-претседател е Мустафа Раџи од Либерија, а меѓу членовите се истакнати фудбалски функционери од целиот свет – меѓу кои и Кохзо Ташима (Јапонија), Чармејн Крукс (Канада), Хрисостомос Гкагкатсис (Грција), Шеик Ахмад Јусеф Ал Сабах (Кувајт), Бранко Радујко (Србија) и Хелга Хелгадотир (Исланд).
Покрај тоа, Генералниот секретар на ФФМ, Леонид Јандреоски, е назначен за член на Комисијата за медиуми и комуникации на ФИФА. Ова тело има цел да ги развива и унапредува стратешките насоки на светската фудбалска федерација во областа на медиумите, дигиталната комуникација и односите со јавноста. Со Комисијата претседава Јасин Идрис Диало (Брег на Слоновата Коска), а негов заменик е Армен Меликбекјан (Ерменија).
Меѓу членовите се наоѓаат и истакнати професионалци од повеќе земји: Фатма Ал Нуими (Катар), Ајишат Фалоде (Нигерија), Ноел Муни (Велс), Хелена Пиреш (Португалија), Аманда Вандерворд (САД) и Тони Ванг (Тајван).
Именувањето на Масар Омерагиќ и Леонид Јандреоски во значајни комитети на ФИФА претставува големо признание за македонскиот фудбал и за работата на Фудбалската федерација на Македонија, потврдувајќи го угледот и влијанието на земјата во рамките на светската фудбалска организација.
