Градот Софија и модерната арена „Софија“ ќе бидат местото каде ќе се одиграат натпреварите од групната фаза, како и осминафиналните и четвртфиналните дуели од Европското првенство 2026 во машка конкуренција.
Ова значи дека домаќинот Бугарија, заедно со репрезентациите на Македонија, Полска, Украина, Португалија и Израел — кои се дел од групата Б — ќе ги одиграат своите мечеви токму во бугарската престолнина.
Првично, Бугарската одбојкарска федерација ја имаше пријавено Варна како град-домаќин, со сала која има капацитет од околу три илјади гледачи. Сепак, по големиот успех на бугарскиот национален тим на Светското првенство минатиот месец, кога стигна до финале и освои сребрен медал, амбициите значително пораснаа.
Поради тоа, федерацијата побара од Европската одбојкарска конфедерација (ЦЕВ) промена на локацијата — наместо Варна, арената „Софија“ со капацитет од 12 илјади гледачи ќе биде новиот центар на настаните. ЦЕВ го прифати барањето, оценувајќи дека тоа е во интерес на одбојката и нејзината понатамошна популаризација.
Репрезентациите сега се во исчекување на официјалниот распоред на натпреварите, кој ЦЕВ ќе го објави по усогласување на термините со четирите земји-домаќини. Продажбата на билетите за Европското првенство ќе започне на 7 ноември.
