Македонскиот стратег Жарко Ристоски продолжува со успешните резултати во Саудиска Арабија, откако со својот тим Ал Хилал го освои Сауди Националниот куп, што претставува одлична најава за новата сезона.
Во финалниот натпревар, Ал Хилал убедливо со 3:0 го совлада Ал Ахли, со што ја одбрани минатогодишната титула и уште еднаш потврди дека е најдобар клуб во земјата. На турнирот учествуваа осумте најдобри екипи, а тимот на Ристоски на патот до трофејот најпрво го елиминираше Ал Насер со 3:1 во четвртфиналето, а потоа во полуфиналето беше поуспешен од Ал Итихад со 3:0.
Ова е втора титула за Ристоски и Ал Хилал сезонава, по освоениот Интернационален клупски шампионат, кој неодамна се одржа во Абу Даби.
Тимот на македонскиот тренер сега ќе се фокусира на подготовките за националното првенство, во кое ќе ја брани шампионската титула. Новата сезона во Саудиската Про лига започнува на 21 ноември.
Во меѓувреме, активностите на клубовите ќе бидат ставени во мирување поради одржувањето на Исламските игри, чии домаќин ќе биде националниот тим на Саудиска Арабија.
