Ракометниот клуб Вардар Неготино има нов стратег – на кормилото се враќа Игор Котевски, кој ќе го наследи Пепи Манасков по неговото заминување од тренерската позиција.
Поразот во Штип од Текстилец (35-33) се покажа како пресуден за промената. Раководството на клубот веднаш реагираше и за кратко време го договори Котевски, дознава Спортска Мрежа од извори блиски до клубот.
Котевски не е непознато име во Неготино — тој веќе го предводеше Вардар во сезоната 2023/24, кога тимот настапуваше во Суперлигата. Искусниот стратег има богато искуство и соработувал со повеќе македонски клубови како Радовиш, Металург, Голден Арт, Куманово, Бутел Скопје и Јуниор КВ.
По две последователни гостински загуби — најпрво во Богданци против Младост, а потоа и во Штип од Текстилец — Вардар Неготино се наоѓа во резултатска криза и моментално има шест бода. Новиот тренер ќе има задача да го „разбуди“ тимот и да го врати во трката за првото место кое носи директен пласман во Суперлигата.
Дебито на Котевски ќе биде токму овој викенд, во дерби натпреварот против Драчево Јуниор на домашен терен — меч кој може многу да каже за идните амбиции и насоката во која ќе се движи Вардар Неготино оваа сезона. Само триумф е опција за да може тимот од Неготино да продолжи сериозно да го напаѓа првото место, пораз од директниот конкурент Драчево Јуниор за Вардар Неготино ќе значат два чекори назад и многу тешка битка за првото место.
