Екипата на прволигашот Брера Струмица се најде во непријатна ситуација, откако доби забрана за трансфери од Светската фудбалска федерација (ФИФА). Според објавената листа од ФИФА, името на струмичкиот клуб се појави на листата од 23.09.2025 што значи дека во наредните три преодни рокови нема да може да регистрира нови играчи.
Причината за оваа санкција се неисплатени финансиски обврски кон странски играчи и тренери, кои ги пријавиле своите побарувања до ФИФА. Федерацијата реагира со вакви мерки за да ги заштити играчите и да обезбеди исплата на долгот.
Оваа блокада може сериозно да влијае на плановите на Брера Струмица во следниот период, особено ако клубот не успее навреме да ги подмири долговите и да ја укине санкцијата.
Интересно е што на листата на ФИФА и понатаму се наоѓа и името на Воска Спорт, поранешен прволигашки клуб кој веќе не е активен во македонскиот фудбал.
